الخونة بيقولوا مفيش دليل ؟؟
الخونة بيقولوا مفيش دليل ؟؟
أنا الدليل ..
أنا الدم اللى سال ع الأرض
ما استكفِـيت ..
أنا العين اللى صابها الغدر
و اتصفِّـيت ..
أنا الأم اللى حرقوا فؤادها ع الغالى
و لبست شال محنِّى بدمه و اتدفِّـيت ..
أنا الدليل ..
أنا المخنوق بسم الغاز على الكوبرى ..
أنا المضروب بمِية خرطوش على ضهرى ..
أنا اللى العمر راح محنة ورا محنة ..
و قلت شاريكى ولا مرة نفَد صبرى ..
أنا المجنى عليه و اليوم بقيت جانى ..
واللى قتلنى برئ و عيونه ناكرانى ..
خرجوا الديابة من القفص أحرار ...
و انا اللى لسه سجين محبوس في أكفانى ..
يا نكسة كانت في التاريخ و اليوم بقِت وكسة ..
يا قلوب و متلونة بالغدر و الخِســة ..
لو كنتوا فاكرين حلمنا ممكن يموت ..
متفرحوش ..
نـــار القصاص و الدم هيتشتعل لســه
ليست هناك تعليقات:
إرسال تعليق